讀陳金順台語文學評論集《夜空恬靜一流星》

 做日頭，莫做流星

：讀陳金順台語文學評論集《夜空恬靜一流星》

向陽

 

台語詩人陳金順，長久以來就受著詩壇注目，伊的詩作毋管是書寫台灣的美景、人文的多樣，或者是關照社會現實、批判政治議題、追討歷史真相，攏展現出伊對台灣深沉的愛。讀伊的詩，總是會感覺，佇伊優雅的詩句內底，有一粒活跳跳的心。 

除了詩創作以外，陳金順猶是一位優秀、有見解的文學評論者。伊誠早就開始評論工課，特別是針對台語文學的理論、歷史佮發展，寫出濟濟文章。伊關照的層面誠開闊，對台語詩的評論，到台語政治小說、女性文學、旅行書寫、文學史，參Siraya族文學等等的課題，伊攏認真研讀、討論，會當提出伊的觀點佮主張。收佇這本評論集的文章，就是伊遮爾濟冬以來拚勢研究的成果。 

這本評論集分做兩卷，上卷以評論為主，收入伊對台語文學作家作品的評論文字。伊評方耀乾的詠史詩、林文平詩作品的手路、楊焜顯的人物詩、陳潔民的愛情詩、胡民祥的小說，攏深入文本，講甲真幼路；伊用「風裡的花蕊」形容戰後台語女性文學、用「飛過太平洋的渡鳥」來形容胡民祥的文學生命、用「夜空恬靜一流星」來譬喻《島鄉台語文學》這本雜誌的總體精神，真奇巧，嘛真穩當，會使得看出伊遮的評論內底，理性思維透濫感性語言的媠氣。 

下卷收四篇學術論文，焦點囥佇「Siraya書寫」、「大河小說」、「旅行散文」、「政治小說」這四个關鍵詞面頂。這四篇論文寫甲誠認真，毋但規格符合學術論文要求，而且每一篇攏有伊個人的觀點和見解，看會出來陳金順想欲起造伊的台語文論述體系的用心。伊對論題真斟酌，參考的文獻、腳注嘛真齊全、詳細，提出的結論有參考價值。讀這四篇論文，會當予咱清楚認捌當前台語文學書寫的熱門課題佮焦點。在我來看，這就是陳金順這本評論集上重要的所在。 

我誠歡喜會當代先拜讀陳金順這本評論集。金順的詩，我真愛讀；無疑悟伊的文學評論嘛寫甲遮深刻、遮幼路。佇台語文學這條坎坎坷坷的路途面頂，陳金順毋但寫詩、閣編雜誌，教冊以外、猶閣用心做學問，這是誠無簡單的代誌。向望金順繼續用伊的筆尖寫落去，為台語文學寫出閣較濟論述，起造閣較嚴密的體系，予對台語文學猶有偏見的論者知所不足，認捌修正。

這是金順的第一本評論集，我向望伊繼續出第二本、第三本……；向望伊佇未來台語文學的論述領域做日頭，莫做流星。

2017/07/02