推薦林榮淑《等待花開的小花苺》

 鼻著咱跤踏的土地的氣味

：推薦林榮淑《等待花開的小花苺》

向陽 

林榮淑的這本台語散文集《等待花開的小花苺》全文六萬外字，攏是伊六七年來用台文寫作、粒積落來的作品，有誠濟作品著過教育部、海翁台語文教育協會主辦的文學獎；嘛有誠濟作品佇台語文重要雜誌《海翁台語文學》、《台江台語文學》、《台文通訊BONG報》發表過。這攏會當看出伊的台語文創作已經得著相當的肯定，這是誠無簡單的代誌。 

這本冊的內容，根據伊家己的分類，分做四個部分：「性命的勇者」、「土地‧花情‧詩情」、「親情的呼喚」佮「美麗的傳說」(囡仔古)，用樸實的文字，真誠的態度佮幼路的觀察，寫出伊對人生、情愛參土地的深情，逐篇攏有伊對生活內層體會出來的智慧佮思考，予咱讀的人跟綴著伊的文字，進入一个充滿台灣文化感的世界，鼻著花芳，鼻著咱跤踏的土地的氣味。 

林榮淑的散文，嘛有相當的藝術性，伊的台語誠文雅，閣誠𠢕運用生活中的對話，運用講古的技巧，營造文章的氣氛，予人感覺特別心適、親切，而且會當得著真濟啟示佮感動。這是一本值得推薦的好冊。

2018/05/27